Mañá temos Asemblea na miña Agrupación, como todas as do PSdeG desde hoxe e ata o próximo 1 de xuño, para propor emendas á Ponencia Marco federal e, en Galicia ademais, á Ponencia Marco do 11º. Congreso dos socialistas galegos, que terá lugar os próximos días 25 a 27 de xullo.

Para a Ponencia federal vou presentar a “Emenda Facebook” (cun parágrafo bis engadido: “A tal efecto, de su representatividad se deducirán los cibermilitantes que sean militantes de Agrupaciones municipales o locales”).

Para a Ponencia galega preparei unha emenda de adicción dun novo epígrafe 551 bis, xa que a mesma non desenvolve a figura do cibermilitante, aínda que o acometo en concordancia coa redacción prevista para o conxunto do PSOE polos epígrafes 459 a 471 da Ponencia federal, cunha única innovación: concretar ao noso ámbito a canalización da cibermilitancia a través dunha Agrupación “virtual” do PSdeG.

Esta é a miña proposta:

A sociedade galega evolucionou, e o PSdeG ten a responsabilidade de responder aos cambios que se produciron. Nos últimos anos, o Partido a todos os seus ámbitos territoriais experimentou novas formas de militancia que son referencia noutros países da nosa contorna. A importancia crecente da rede fai que cada vez máis cidadáns participen politicamente a través dela. O Partido dos Socialistas tratou de canalizar a participación dos cidadáns que se dirixiron ao PSdeG ben para facer unha consulta, ben para expresar unha opinión, ben para ser verdadeiros axentes electorais do partido. Estamos claramente ante unha nova forma de activismo político.

O certo é que existe unha nova forma de militancia política, distinta á tradicional, compatible e complementaria dela. Temos vocación de partido líder en canto a ferramenta de participación política e á vangarda no noso proxecto político e na nosa forma de traballar. Por iso o PSdeG creará a figura do cibermilitante. Modificaremos os nosos Estatutos para recoller esta nova forma de militancia cuxas principais características son o dinamismo, a interactividade e a inmediatez. Os cibermilitantes terán no PSdeG os dereitos que se lle recoñezan a nivel federal e, en todo caso, canalizarán a súa participación na vida do noso Partido a través dunha Agrupación “virtual” de ámbito nacional con órganos propios.